Gujarat Weather News : ગુજરાતમાં ગરમીનો કહેર જોવા મળી રહ્યો છે. માર્ચ મહિનામાં જ ગરમીએ હાહાકાર બોલાવ્યો છે. અમદાવાદ અને ગાંધીનગરમાં ગરમીનો પારો 39 ડિગ્રીની આસપાસ પહોંચ્યો છે. ત્યારે ગઈકાલથી ગરમીમાં આંશિક રાહત જોવા મળી રહી છે.
જો કે, હવામાન વિભાગે રાજ્યના અનેક વિસ્તારમાં હીટવેવની આગાહી કરી છે. હવામાન વિભાગે જણાવ્યું હતું કે, રાત્રિ તાપમાનમાં વધારો જોવા મળશે. હવામાન વિભાગના જણાવ્યા મુજબ 15થી 17 માર્ચ દરમિયાન ગુજરાત, ઓડિશા, વિદર્ભ, છત્તીસગઢ, ઝારખંડ, પશ્ચિમ બંગાળ, તેલંગાણા, આંધ્રપ્રદેશ અને કર્ણાટકમાં તીવ્ર ગરમી રહેશે. ત્યારે ગરમીમાં વધુ સમય પસાર કરનાર લોકોએ ખાસ તકેદારી રાખવા પણ આગાહી કરવામાં આવી છે.
હીટવેવથી બચવા શું કરવું અને શું ના કરવું?
આટલું કરો
• તરસ ના લાગી હોય તો પેણ યોગ્ય માત્રામાં પાણી પીવું
• શરીરમાં પ્રવાહીની માત્રા ઓછી ના થાય તે માટે ORS દ્રાવણ અથવા છાશ, લસ્સી, લીંબુ પાણી, ભાતનું ઓસામણ અને નારિયેળ પાણીનો ઉપયોગ કરો
• ઘરની બહાર જતી વખતે માથાનો ભાગ કપડાં, છત્રી કે ટોપીથી ઢાંકી રાખો
વજનમાં અને રંગમાં હળવા પ્રકારના સુતરાઉ વસ્ત્રો પહેરો
આંખોના રક્ષણ માટે સનગ્લાસીસ અને ત્વચાના રક્ષણ માટે સનસ્ક્રીન લગાવો
• પ્રાથમિક સારવાર માટેની તાલીમ લો
• બાળકો, વૃદ્ધો, બિમાર વ્યક્તિ કે વધુ વજન ધરાવતા વ્યક્તિ કે જેઓ “લૂ”ના ભોગ બનવાની સંભાવના વધુ ધરાવે છે તેમની વિશેષ કાળજી રાખો
આટલું ના કરો
• શક્ય હોય ત્યાં સુધી બપોરના ૧૨ વાગ્યાથી ૪ વાગ્યા સુધી તડકામાં બહાર ન નીકળવું
શરીરમાંથી પાણીનું પ્રમાણ ઘટાડે તેવા પીણાં જેવા કે ચા, કોફી, સોફટ ડ્રિક્સ ના લેવા
• મસાલેદાર, તળેલા, વધુ પડતા મીઠાવાળા આહારનો ઉપયોગ ટાળવો
લૂ લાગેલ વ્યક્તિની પ્રાથમિક સારવાર
• જો કોઈ વ્યક્તિને લૂ લાગી હોય તો પ્રાથમિક સારવાર માટે ભીના કપડાનો ઉપયોગ કરો અથવા તેના માથા પર પાણી રેડો
શરીરમાં પાણીનું પ્રમાણ જળવાઇ રહે તે માટે ORS દ્રાવણ અથવા લીંબુ પાણી આપો
લૂ લાગેલ વ્યક્તિને તાત્કાલિક નજીકના આરોગ્ય કેન્દ્ર પર લઇ જવા
જો શરીરનું તાપમાન સતત વધતું હોય, માથાનો અસહ્ય દુઃખાવો હોય, નબળાઇ હોય, ઉલટી થતી હોય કે બેભાન થઇ જાય તો તાત્કાલિક એમ્બ્યુલન્સ બોલાવવી
