1 નવેમ્બરે બે ફિલ્મો સિનેમાઘરોમાં રિલીઝ થવા જઈ રહી છે. પ્રથમ કાર્તિક આર્યનની ‘ભૂલ ભુલૈયા 3’ અને બીજી અજય દેવગનની ‘સિંઘમ અગેન’ છે. આ વર્ષની સૌથી મોટી ટક્કર માનવામાં આવી રહી છે. રિલીઝ પહેલા જ બંને ફિલ્મના મેકર્સ વચ્ચે ઘર્ષણ ચાલી રહ્યું છે. હવે ભૂલ ભૂલૈયા 3નું એડવાન્સ બુકિંગ શરૂ થઈ ગયું છે.
સિંઘમ અગેનને PVR આઇનોક્સમાં 60 ટકા સ્ક્રીન મળવાની ચર્ચા
એવા અહેવાલો આવી રહ્યા છે કે, બંને ફિલ્મોના મેકર્સ ઈચ્છે છે કે, તેમની ફિલ્મને વધુ સ્ક્રીન મળે. જો કે સિંઘમ અગેનને PVR આઇનોક્સમાં 60 ટકા સ્ક્રીન મળવાની ચર્ચા છે. આ સિવાય સિંઘમ અગેનમાં નિર્માતાઓ સિંગલ સ્ક્રીન થિયેટરોમાં વધુ શોની માંગ કરી રહ્યા છે. આ સ્થિતિમાં માહિતી સામે આવી રહી છે કે, જ્યાં સુધી સ્ક્રીન સંબંધિત સમસ્યાનું નિરાકરણ નહીં આવે ત્યાં સુધી એડવાન્સ બુકિંગ શરૂ નહીં થાય. જોકે હવે કેટલીક જગ્યાએ તેનું એડવાન્સ બુકિંગ શરૂ થઈ ગયું છે.
BookMyShow પર ટિકિટ બુક કરી શકો છો
ભૂલ ભુલૈયા 3ની ટિકિટ BookMyShow પર ઉપલબ્ધ છે. આ બુકિંગ માત્ર થોડા થિયેટર માટે જ ખુલ્લું છે.હાલમાં દિલ્હીમાં માત્ર બે થિયેટરોમાં ટિકિટ બુક કરી શકાય છે. નોઈડામાં માત્ર બે થિયેટરોમાં બુકિંગ શરૂ થયું છે. જ્યારે અન્ય શહેરોમાં પણ આવી જ સ્થિતિ છે.
સિંઘમ અગેનનું બુકિંગ હજુ સુધી શરૂ થયું નથી
બંને ફિલ્મોની રિલીઝને હવે માત્ર પાંચ દિવસ બાકી છે. એક તરફ ‘ભૂલ ભુલૈયા 3નું બુકિંગ કેટલાક થિયેટરોમાં શરૂ થઈ ગયું છે. તો બીજી તરફ સિંઘમ અગેનનું બુકિંગ હજુ સુધી શરૂ થયું નથી. જો કે હવે જોવાનું એ રહે છે કે, બંને ફિલ્મો રિલીઝ થયા બાદ બોક્સ ઓફિસ પર કોણ જીતશે.
