દશેરાના દિવસે મહેસાણાથી એક ખૂબ જ ખરાબ સમાચાર સામે આવી રહ્યા છે. કડીના જાસલપુર -અલદેસણ ગામ વચ્ચે આવેલી સ્ટીલ ઇનોક્સ સ્ટેઇનલેસ પ્રા.લી. કંપનીમાં કરૂણ ઘટના બની છે. અહીં અંડર કન્સ્ટ્રક્શન સ્ટીલ કંપનીમાં જયારે કામ ચાલી રહ્યું હતું ત્યારે અચાનક જ માટીની ભેખડ ધસી પડી હતી. આ દુર્ઘટનામાં 9 જેટલા શ્રમિકોના મૃતદેહ મળી આવ્યા છે. જયારે અન્યને બહાર કાઢવા માટે જેસીબીની મદદ લેવામાં આવી છે. આ ઘટનાના કારણે અફરા-તફરી મચી જવા પામી છે. દુર્ઘટનાની જાણ થતા જ પાંચ જેટલી એમ્બ્યુલન્સ અને DDO ડો. હસરત જાસ્મીન, SP ડૉ. તરૂણ દુગ્ગલ, Dy.SP મિલાપ પટેલ સહિતનો પોલીસ કાફલો તેમજ ફાયર વિભાગની ટીમ ઘટનાસ્થળે પહોંચી છે.
મુખ્યમંત્રી ભુપેન્દ્ર પટેલ અને વડાપ્રધાન નરેન્દ્ર મોદીએ આ દુર્ઘટનાને લઇ દુઃખ વ્યક્ત કર્યું છે. PMO તરફથી મૃતકોના પરિવારજનોને રૂપિયા 2 લાખની સહાયની જાહેરાત કરવામાં આવી છે. જયારે ઇજાગ્રસ્તોને રૂપિયા 50,000ની સહાયની જાહેરાત કરવામાં આવી છે. આ દુર્ઘટનામાં ગુજરાત સરકાર તરફથી પ્રત્યેક મૃતકના પરિવારજનને રૂપિયા 4 લાખ અને ઇજાગ્રસ્તોને રૂપિયા 50,000ની સહાય જાહેર કરવામાં આવી છે.
મહેસાણાની આ દુર્ઘટનામાં ફેક્ટરી માલિકની ગંભીર બેદરકારી સામે આવી હોવાનું જાણવા મળી રહ્યું છે. સૂત્રો પાસેથી મળતી માહિતી મુજબ, કામગીરી ચાલી રહી હતી તે દરમિયાન કામદારોએ જણાવ્યું હતું કે, આ ભાગ જોખમી છે, ગમે ત્યારે મોટી દુર્ઘટના સર્જાઇ શકે તેમ છે. પરંતુ તેમની વાતની અવગણના કરવામાં આવી હતી અને કામગીરી આગળ ધપાવવામાં આવી હતી.
આ ઘટનામાં મેનેજર અને સુપરવાઇઝર કૌશિક પરમાર સામે કાર્યવાહી ચાલુ થઇ ચુકી છે. નોંધનીય છે કે, અહીં સેફ્ટીના સાધનોનો અભાવ હોવાનું પણ સામે આવ્યું છે. આ ઘટનામાં ખરા અર્થમાં કોણ જવાબદાર છે તે અંગે હાલમાં તપાસ ચાલું છે.
મૃતકોના નામ
- રાજુભાઇ મેડા – રામપુરા ગામ
- મુકેશ કમાલ – ખામાસણ ગામ
- આશિષ કાલી – મહુડી ગામ
- આયુષ્ય કાલી – મહુડી ગામ
- મહેન્દ્ર રમેશ બારૈયા – રાજસ્થાન
- જગન્નાથ રમેશ બારૈયા
- અરવિંદ – દાહોદ
