ઈન્ટરનેશનલ ક્રિકેટ કાઉન્સિલે ભારત અને ન્યૂઝીલેન્ડની ટીમો વચ્ચે રમાઈ રહેલી ટેસ્ટ શ્રેણી વચ્ચે તાજેતરની ટેસ્ટ રેન્કિંગ જાહેર કરી છે. આ રેન્કિંગમાં ભારતીય ખેલાડીઓને ભારે નુકસાનનો સામનો કરવો પડ્યો છે. ભારતના સ્ટાર ફાસ્ટ બોલર જસપ્રીત બુમરાહે ટેસ્ટમાં નંબર-1 બોલરનો તાજ ગુમાવી દીધો છે. ન્યૂઝીલેન્ડ સામે રમાઈ રહેલી ટેસ્ટ સીરીઝમાં તેનું પ્રદર્શન અત્યાર સુધી કંઈ ખાસ રહ્યું નથી, જેના કારણે દક્ષિણ આફ્રિકાના એક બોલરે તેને પાછળ છોડી દીધો છે. આ આફ્રિકન બોલરે તાજેતરમાં બાંગ્લાદેશ સામે શાનદાર બોલિંગ કરી હતી.
કગિસો રબાડા હવે ટેસ્ટનો નવો નંબર-1 બોલર બની ગયો
જસપ્રીત બુમરાહને ન્યૂઝીલેન્ડ સામેની ટેસ્ટ શ્રેણીની બીજી મેચમાં એક પણ વિકેટ મળી ન હતી જેના કારણે તેને લેટેસ્ટ ટેસ્ટ રેન્કિંગમાં નુકસાન સહન કરવું પડ્યું છે. હવે તે નંબર વનમાંથી ત્રીજા નંબરે પહોંચી ગયો છે. દક્ષિણ આફ્રિકાનો કગિસો રબાડા હવે ટેસ્ટનો નવો નંબર-1 બોલર બની ગયો છે. કગિસો રબાડા તાજેતરમાં જ ટેસ્ટ ક્રિકેટના ઈતિહાસમાં બોલના સંદર્ભમાં 300 વિકેટ લેનારો સૌથી ઝડપી બોલર બન્યો હતો હવે તેને આઈસીસી તરફથી ટેસ્ટ રેન્કિંગમાં તેનું ઈનામ મળ્યું છે.
બુમરાહા ત્રીજા નંબરે પહોંચી ગયો
દક્ષિણ આફ્રિકાની ટીમ હાલ બાંગ્લાદેશના પ્રવાસે છે. બંને ટીમો વચ્ચે 2 મેચની ટેસ્ટ સીરિઝ રમાઈ રહી છે. દક્ષિણ આફ્રિકાની ટીમે આ શ્રેણીની પ્રથમ મેચ જીતી હતી. આ જીતનો હીરો કગીસો રબાડા હતો. કગિસો રબાડાએ આ મેચમાં કુલ 9 વિકેટ લીધી હતી. તેણે મેચની પ્રથમ ઇનિંગમાં કુલ 3 બેટ્સમેનોને પોતાનો શિકાર બનાવ્યા અને પછી બીજી ઇનિંગમાં 6 વિકેટ ઝડપી હતી.
