ઓમાનમાં રમાઈ રહેલા ઇમર્જિંગ ટીમ એશિયા કપ 2024માં ઇન્ડિયા-એનું શાનદાર પ્રદર્શન યથાવત છે. ઇન્ડિયા-એ સતત ત્રીજી જીત હાંસલ કરી છે. આ સાથે ટીમ ઇન્ડિયા ટૂર્નામેન્ટની સેમિફાઈનલમાં પહોંચી ગઇ છે. તિલક વર્માની કેપ્ટનશીપ હેઠળની ટીમે બુધવારે ગ્રુપ સ્ટેજની તેની ત્રીજી અને છેલ્લી મેચમાં યજમાન ઓમાનને 6 વિકેટથી હરાવ્યું અને આ રીતે 100 ટકા રેકોર્ડ સાથે નોક આઉટ રાઉન્ડમાં પ્રવેશ કર્યો હતો. ટીમ ઈન્ડિયાની જીતનો સ્ટાર આયુષ બદોની હતો જેણે માત્ર 27 બોલમાં 51 રનની વિસ્ફોટક ઈનિંગ રમી હતી. તેના સિવાય ઓપનર અભિષેક શર્માએ ફરી એકવાર ટીમને ઝડપી શરૂઆત અપાવી હતી. સેમિફાઇનલમાં ઇન્ડિયા-એનો સામનો અફઘાનિસ્તાન-એ સામે થશે.
આયુષ બદોની મેન ઓફ ધ મેંચ
જેના જવાબમાં ફરી એકવાર અભિષેક શર્માએ વિસ્ફોટક બેટિંગ કરી અને આવતાની સાથે જ ટીમ માટે રનનો વરસાદ કર્યો હતો. ડાબોડી બેટ્સમેન અભિષેકે માત્ર 15 બોલમાં 34 રન બનાવ્યા જેમાં 5 ફોર અને 1 સિક્સ સામેલ હતી. જ્યારે આ મેચ માટે ટીમમાં આવેલ અનુજ રાવત કંઈ ખાસ કરી શક્યો ન હતો અને માત્ર 8 રન કરીને આઉટ થઈ ગયો હતો. આ પછી કેપ્ટન તિલક (અણનમ 36) આયુષ સાથે મળીને ટીમની ઇનિંગ સંભાળી અને તેને જીતની નજીક લઈ ગયા હતા. દરમિયાન આયુષ બદોનીએ માત્ર 25 બોલમાં પોતાની અડધી સદી પૂરી કરી હતી. આયુષે પોતાની ઇનિંગમાં 6 ફોર અને 2 સિક્સર ફટકારી હતી. અંતમાં રમનદીપ સિંહે માત્ર 4 બોલમાં 13 રન ફટકારીને ટીમને 15.2 ઓવરમાં 6 વિકેટે વિજય અપાવ્યો હતો.
ભારત A અફઘાનિસ્તાન A સામે રમશે
આ સાથે ટીમ ઈન્ડિયાએ ગ્રુપ બીની પોતાની ત્રણેય મેચ જીતી લીધી છે. પ્રથમ મેચમાં ભારતે પાકિસ્તાન A ને હરાવ્યું અને પછીની મેચમાં સંયુક્ત આરબ અમીરાતને હરાવ્યું. આ રીતે ભારત A ગ્રુપમાં 3 મેચમાં 6 પોઈન્ટ સાથે પ્રથમ સ્થાને છે. આ કારણે સેમિફાઇનલમાં તેનો મુકાબલો અફઘાનિસ્તાન A સામે થશે, જે ગ્રુપ Aમાં બીજા સ્થાને હતી. આ મેચ 25મી ઓક્ટોબરે રમાશે. પ્રથમ સેમિફાઇનલમાં ગ્રુપ Aની વિજેતા શ્રીલંકા A અને ગ્રુપ Bની નંબર બે ટીમ પાકિસ્તાન A વચ્ચે મુકાબલો થશે. આ મેચ પણ 25મી ઓક્ટોબરે જ રમાશે.
