રશિયાના કઝાન શહેરમાં બ્રિક્સ સમિટનો આજે બીજો દિવસ છે. આ સમિટમાં આજે લગભગ પાંચ વર્ષ બાદ વડાપ્રધાન નરેન્દ્ર મોદી અને ચીનના પ્રમુખ શી જિનપિંગ સાથે દ્વિપક્ષીય બેઠક યોજાઈ હતી. બંને દેશ વચ્ચે અંદાજિત એક કલાક સુધી બેઠક ચાલી હતી. વર્ષ 2020માં ગલવાન ઘાટીના સંઘર્ષ બાદ બંને દેશો વચ્ચેના મતભેદો વધુ ઘેરા બન્યા હતા. આ બેઠક એવા સમયે થઈ રહી છે જ્યારે લદ્દાખમાં LAC પર ભારત અને ચીન વચ્ચે છેલ્લા ચાર વર્ષથી ચાલી રહેલા વિવાદનો ઉકેલ આવી ગયો છે. હવે બંને દેશો સબંધોમાં આવેલી ખાટાશને દૂર કરવા તરફ આગળ વધી રહ્યા છે.
Bilateral meeting between Prime Minister Narendra Modi and Chinese President Xi Jinping, begins in Kazan, Russia on the sidelines of the BRICS Summit pic.twitter.com/4qZGjYN2Au
— ANI (@ANI) October 23, 2024
પીએમ મોદી અને શી જિનપિંગ વચ્ચે છેલ્લી ઔપચારિક મુલાકાત ઓક્ટોબર 2019માં તમિલનાડુના ઐતિહાસિક શહેર મહાબલીપુરમમાં થઈ હતી. આ પહેલા મંગળવારે વડાપ્રધાન મોદીએ રશિયાના પ્રમુખ વ્લાદિમીર પુતિન સાથે દ્વિપક્ષીય બેઠક કરી હતી. પીએમ મોદીએ ઈરાનના પ્રમુખ મસૂદ પેઝેશ્કિયન સાથે પણ મુલાકાત કરી હતી.
પીએમ મોદીએ વિશ્વને શાંતિનો સંદેશ આપ્યો
આ પહેલા પીએમ મોદીએ બ્રિક્સ શિખર સમ્મેલનને સંબોધિત કરી વિશ્વને શાંતિનો સંદેશ આપ્યો છે. પીએમએ કહ્યું હતું કે, ‘આજની બેઠકના શાનદાર આયોજન માટે હું પ્રમુખ પુતિનનો હાર્દિક આભાર વ્યક્ત કરું છું. હું ખૂબ જ ખુશ છું કે આજે આપણે વિસ્તૃત બ્રિક્સ પરિવાર તરીકે પ્રથમ વખત મળી રહ્યા છીએ. બ્રિક્સ પરિવાર સાથે જોડાયેલા તમામ નવા સભ્યો અને સાથીઓનું હું હૃદયપૂર્વક સ્વાગત કરું છું.’
યુદ્ધ નહીં, વાતચીત અને વ્યૂહનીતિનું સમર્થન કરીએ છીએ
આ દરમિયાન વડાપ્રધાન મોદીએ યુદ્ધનો મુદ્દો પણ છેડ્યો. તેમણે કહ્યું કે, ‘અમે યુદ્ધ નહીં, વાતચીત અને વ્યૂહનીતિનું સમર્થન કરીએ છીએ અને જે રીતે આપણે સાથે મળીને કોવિડ-19 જેવા પડકારને હરાવ્યો છે. એવી જ રીતે અમે ભાવિ પેઢીઓ માટે સુરક્ષિત, મજબૂત અને સમૃદ્ધ ભવિષ્ય માટે નવી તકો ઊભી કરવામાં સંપૂર્ણ રીતે સક્ષમ છીએ. આતંકવાદ અને ટેરર ફન્ડિંગનો સામનો કરવા માટે આપણે બધાએ એક મત થઈને દ્રઢતાથી સહયોગ આપવો પડશે. આવા ગંભીર વિષય પર બેવડા ધોરણો માટે કોઈ સ્થાન નથી. આપણા દેશના યુવાનોમાં કટ્ટરતાને રોકવા માટે આપણે સક્રિય પગલાં લેવા જોઈએ. યુએનમાં આંતરરાષ્ટ્રીય આતંકવાદ પર વ્યાપક સંમેલનના પેન્ડિંગ મુદ્દા પર આપણે સાથે મળીને કામ કરવું પડશે. એવી જ રીતે સાયબર સિક્યોરિટી, સેફ અને secure AI માટે વૈશ્વિક નિયમો માટે કામ કરવું જોઈએ.’
