‘Operation માફિયા – ચાર દિવસ પહેલાં રાજ્યમાં બાયો ડીઝલના કાળાબજાર વિરુદ્ધ NEWZ ROOM ગુજરાત દ્વારા ઓપરેશન માફિયા ચલાવાયું હતું. NEWZ ROOM ગુજરાતના સ્ટીંગ ઓપરેશન બાદ બે દિવસ માટે આખા રાજ્યમાં ગેરકાયદેસર સપ્લાય બંધ કરી દેવામાં આવ્યો હતો. પરંતુ માત્ર થોડા જ દિવસોમાં ફરીથી આ સપ્લાય શરૂ કરી દેવામાં આવ્યું છે. ચોંકાવનારી વાત એ છે કે કેટલાક વિસ્તારોમાં બાયો ડીઝલનો વ્યવસાય પોલીસ ચોકીઓના બાજુમાં જ ચાલે છે. NEWZ ROOM ગુજરાતને મળેલી માહિતી અને પુરાવાઓ અનુસાર પોરબંદર અને જૂનાગઢ જિલ્લામાં ફરીથી મોટાપાયે બાયો ડીઝલનું કાળાબજાર શરૂ થયું છે.
NEWZ ROOMને મળેલા ચોંકાવનારા પુરાવા
NEWZ ROOM પાસે આવા વધુ 250થી વધુ વિડીયો આવ્યા છે, જેમાં ગુનાહિત પ્રવૃત્તિઓ જોવા મળી રહી છે. ગોમટા હાઇવે પોલીસ ચેકપોસ્ટ નજીક બાયો ડીઝલનું વેચાણ ખુલ્લેઆમ થતું હોવાનું સ્પષ્ટ જોવા મળે છે. મહત્વનું છે કે આ વિડીયો ન્યુઝ રૂમ ગુજરાતના દર્શકોએ જ મોકલીને પૂરાવા આપ્યા છે.
કથિત સૂત્રધારોના નામો સામે આવ્યા
NEWZ ROOMને મળેલી માહિતી મુજબ, બાયો ડીઝલના કથિત માફિયાઓમાં નીચેના નામો હાલ ચર્ચામાં છે:
•પિન્ટુ, કમલેશ, હરદેવ, ચિરાગ, અને ડાભી તરીકે ઓળખાતો વ્યક્તિ.
•ગોપાલ નામનો વ્યક્તિ જે કેમિકલ મિક્સિંગનો માસ્ટર માઈન્ડ હોવાનું કહેવાય છે.
આ માફિયાઓ સૌરાષ્ટ્રના મોટાભાગના જિલ્લામાં બાયો ડીઝલ સપ્લાય કરે છે. રાજ્યના અનેક વિસ્તારોમાં પોલીસ અને પુરવઠા વિભાગના કેટલાક કર્મચારીઓ હપ્તાખોરીના બદલે આ કાળાબજારને આશ્રય આપી રહ્યાં હોવાનો પણ આક્ષેપ છે.
સપ્લાય નેટવર્ક: રાજ્યવ્યાપી ગેરકાયદેસર ચેઇન
આ કાળાબજાર માત્ર પોરબંદર અને જૂનાગઢ સુધી મર્યાદિત નથી. બાયો ડીઝલનું ગેરકાયદે વેચાણ અને સપ્લાય નીચેના જિલ્લાઓમાં નોંધાઈ રહ્યું છે:
•રાજકોટ, જામનગર, અમરેલી, સુરેન્દ્રનગર, ગીર સોમનાથ
•કચ્છ, ભાવનગર, દ્વારકા, બોટાદ, અને મોરબી
પૌષ્ટિક તત્વો વગરના કેમિકલ મિક્સ ડીઝલને વાહનોમાં ભરવામાં આવે છે, જેના કારણે યંત્રોના જીવનકાળને નુકસાન થવાની પણ ભીતિ છે. આ કારણોસર રાજ્યના આવક વિભાગને કરોડોની GSTની કરચોરી થાય છે.
શું કરશે સરકાર?
અહિયાં સૌથી મોટો પ્રશ્ન એ છે કે સરકાર કેવા પગલા લે છે? શું ફરી એક વખત માત્ર “ઓપરેશન”થી કામ ચાલશે કે આગળ ન્યૂનતમ કાયદેસર પગલાં પણ ભરાશે?
NEWZ ROOM આગળ પણ આવા તમામ કથિત માફિયાઓના પર્દાફાશ માટે દરેક પુરાવા જાહેર કરવાનું ચાલુ રાખશે.
