IPL 2025ની મેગા ઓક્શનમાં ઘણા ખેલાડીઓના ભાવિનો નિર્ણય થવાનો છે. આવી સ્થિતિમાં, ચાહકો અને લીગમાં સામેલ થનારા ખેલાડીઓ તેની આતુરતાથી રાહ જોઈ રહ્યા છે. આ માટે BCCIએ તાજેતરમાં જ રિટેન્શન નિયમો પણ જાહેર કર્યા હતા. જો કે, મેગા ઓક્શન ક્યારે અને ક્યાં યોજાનાર છે તે અંગે કોઈ માહિતી આપવામાં આવી નથી. પરંતુ હવે આ અંગે એક મોટું અપડેટ સામે આવ્યું છે, જેમાં મેગા ઓક્શનનું સ્થળ અને તારીખ અંગે જાણકારી સામે આવી છે. એક અહેવાલ મુજબ, સાઉદી અરેબિયાની રાજધાની રિયાધને આ ઈવેન્ટ માટે સૌથી પસંદગીનું સ્થળ માનવામાં આવે છે. અને BCCI ટૂંક સમયમાં તેને મંજૂરી આપી શકે છે.
BCCI થોડા દિવસોમાં તેને મંજૂરી આપશે
BCCI મેગા ઓક્શન માટે સાઉદી અરેબિયાના બે શહેરો રિયાધ અને જેદ્દાહનું નિરીક્ષણ કરી રહ્યું છે. આમાં રિયાદનું નામ સૌથી આગળ છે અને શક્ય છે કે BCCI થોડા દિવસોમાં તેને મંજૂરી આપે. અહેવાલો અનુસાર બોર્ડના અધિકારીઓ બંને શહેરોની મુલાકાત લઈ ચૂક્યા છે. સોમવાર 21 ઓક્ટોબરે ફરી એકવાર અધિકારીઓ નિરીક્ષણ કરવા જઈ શકે છે. આ પછી સ્થળ નક્કી કરવામાં આવશે. ક્રિકબઝના અહેવાલ મુજબ, IPL 2025ની મેગા હરાજી 24 અને 25 નવેમ્બરે યોજાઈ શકે છે. જોકે, BCCIએ હજુ સુધી તેની પુષ્ટિ કરી નથી.
BCCI ભારતીય સમય પ્રમાણે બપોરે હરાજીનો સમય રાખવા માંગે છે
BCCIએ અગાઉ લંડન, દુબઈ, સિંગાપોર અને ઓસ્ટ્રેલિયાના એક શહેરને IPL 2025ની મેગા ઓક્શન હોસ્ટ તરીકે લિસ્ટમાં રાખ્યા હતા. પરંતુ હવે આ ચાર શહેરોને યાદીમાંથી હટાવી દેવામાં આવ્યા છે. લંડનને તેના હવામાનને કારણે યાદીમાંથી દૂર કરવામાં આવ્યું હતું. જ્યારે ઓસ્ટ્રેલિયા સમય ઝોનમાં મોટા તફાવતને કારણે બાકાત રહી ગયું છે. BCCI ભારતીય સમય પ્રમાણે બપોરે હરાજીનો સમય રાખવા માંગે છે. પરંતુ ઓસ્ટ્રેલિયા અને ભારત વચ્ચેના સમયમાં ઘણો તફાવત છે.
IPLની છેલ્લી હરાજી દુબઈમાં યોજાઈ હતી
આ સિવાય બ્રોડકાસ્ટર્સ પણ આમાં મોટી સમસ્યા બની ગયા. વાસ્તવમાં, ભારત અને ઓસ્ટ્રેલિયા વચ્ચે 22 થી 26 નવેમ્બરની વચ્ચે મેચ રમાવાની છે. દરમિયાન, BCCI પણ એક મેગા ઓક્શન કરવા માંગતી હતી અને બંનેના બ્રોડકાસ્ટિંગ પાર્ટનર ડિઝની સ્ટાર છે. IPLની છેલ્લી હરાજી દુબઈમાં યોજાઈ હતી. બોર્ડ આ વખતે અહીં મેગા ઓક્શન કરવા માંગતું નથી.
